Stundum spyr fólk okkur af hverju við veljum erfiðari leiðina?  Að hanna sjálf hverja flík. Framleiða í litlu magni. Eyða ótal klukkustundum í að finna rétt efni, gera rétt snið, finna réttu framleiðendurna sem deila sýn okkar á nútímalegan og sjálfbæra tískuiðnað. Að reka lítið hönnunarfyrirtæki á Íslandi þegar heimurinn býður upp á endalaust framboð af fatnaði sem hægt er að panta með einum smelli. Svarið er í raun einfalt.

Við trúum því að það skipti máli hver býr til hlutina sem við umgöngumst á hverjum degi. Við trúum því að föt geti borið með sér sögu. Að þau geti verið hönnuð af ást og gerð til að endast, eldast fallega og verða hluti af lífi fólks.

Við höfum bæði starfað við hönnun í meira en þrjátíu ár. Við höfum séð tískuna verða hraðari með hverju árinu. Fleiri vörur. Meira magn. Lægra verð. Meiri neysla.

En við höfum líka séð eitthvað annað.Við höfum séð fleira og fleira fólk sem er farið að þrá hið gagnstæða. Fólk sem vill eiga færri en betri hluti. Fólk sem vill vita hver hannaði flíkina sem það klæðist. Fólk sem vill finna gæðin þegar það snertir efnið og vita að flíkin hafi verið gerð af virðingu fyrir handverki, fólkinu sem vann hana og umhverfinu sem hún verður hluti af. Við getum sagt söguna að baki hverri flík. Hugmyndina, hver framleiddi efnið, tölurnar, hver saumaði hana og sögu þeirra fyrirtækja sem koma að framleiðslunni. Í flestum tilfellum þá höfum við unnið með þeim í áratugi. 

Kannski er það þess vegna sem við trúum enn á framtíð heilbrigðari tísku.

Ekki vegna þess að þau eigi alltaf auðveldast með að keppa við alþjóðlega risana. Heldur vegna þess að þau færa heiminum eitthvað sem ekki er hægt að fjöldaframleiða.

Persónuleika. Sköpun. Handverk. Persónulegar sögur. 

Á litlu landi eins og Íslandi skiptir það enn meira máli. Ef við viljum að hér verði áfram til sjálfstæð hönnun, nýjar hugmyndir og skapandi fyrirtæki, þá þarf fólk að velja að styðja við þau. Hver ákvörðun skiptir máli. Ekki aðeins fyrir okkar fyrirtæki heldur fyrir samfélagið sem við viljum byggja og þá menningu sem við viljum skilja eftir. Thomsen hefur aldrei snúist um að selja sem flestar flíkur. Það hefur alltaf snúist um að skapa færri, en betri. 

En Thomsen er líka meira en fatnaður. Við höfum alltaf trúað því að fallegar flíkur eigi skilið fallegt umhverfi. Að verslun eigi ekki aðeins að vera staður þar sem farið er inn, greitt og farið út. Hún geti verið falleg upplifun.

Þess vegna lögðum við jafn mikla ást í að skapa rýmið okkar og flíkurnar sjálfar. Stað þar sem fólk getur komið inn af götunni, sest niður, spjallað við okkur sem hönnum fatnaðinn, skoðað efnin, fundið gæðin með eigin höndum og gefið sér tíma.

Kannski er það einmitt það sem okkur vantar meira af í dag. Anda inn og út. Ekki meiri hraða. Heldur meiri tengingu.

Ef þú hefur valið Thomsen, hvort sem það er í fyrsta sinn eða í tíunda sinn, þá viljum við þakka þér. Þú ert ekki aðeins að kaupa flík. Þú ert að styðja hönnun. Handverk. Litla sköpun á stórum alþjóðlegum markaði. Og þú hjálpar okkur að halda áfram að gera það sem okkur þykir vænst um. Að búa til fallegar uppáhaldsflíkur. 

Hjá Thomsen leggjum við mikið upp úr heildarmynd Thomsen Reykjavík fyrir upplifun viðskiptavina okkar. Tónlist talar við skilningarvitin rétt eins og fallegir hlutir. Tónlistin sem notuð er á bakvið myndböndin okkar er samin af Gunna Hilmarssyni og Arnari Guðjónssyni og endurspeglar hún Thomsen heiminn og er samin út frá honum.